【甜在心】Joyful Dessert House

相信大家對旺角黑布街都唔會好陌生，久唔久就有朋友係黑布街食野打下卡，黑布街有咩？有hesheeat, next station dessert仲有今次我地SPD4459油尖旺爹您術士介紹既Joyful Dessert House!

話說個晚SPD4459爹您術士先去左太子始創中心Rbtea食左個dinner(詳情見另一篇blog - 【鬆一鬆】Rbtea: http://deliyautsimmong.blogspot.hk/2014/10/rbtea.html),之後意猶未盡想食個甜品，所以就黎到傳說中既黑布街，實不相瞞，一開頭我地先去左Next Station Dessert等位，但實在太多人同埋真係幾貴，於是去左對面Joyful Dessert House度試下，無諗到有意外驚喜......

Joyful Dessert House

Menu

好多賣相好吸引既甜品

我地等左一陣就有位了

坐低第一件事梗係睇下個menu有咩食，琳瑯滿目，每個賣相都非常吸引，令人垂涎三尺，最後我地決定試一試其中五樣:沖繩黑糖OREO 牛乳芭菲，燒菠蘿雪芭，朱古力窩夫，法式焦糖燉蛋同埋玉桂蘋果金寶盅

沖繩黑糖OREO 牛乳芭菲 $56

值得一讚佢出甜品既速度，我地落完order一陣就上了第一個:沖繩黑糖OREO 牛乳芭菲
杯芭菲有層次, 因為可以好明確睇到一層層係咩材料 
(雪糕 -> OREO餅碎 -> Cream -> 沖繩黑糖Jelly -> 雪糕 -> 沖繩黑糖醬 -> Cream -> OREO餅碎 -> Cream -> 沖繩黑糖Jelly ->Cream)

我地先試雪糕，有驚喜！呢個上面係雲呢拿雪糕，比較硬身但味道有別於街外既雪糕，Joyful Dessert House既比較滑同香，唔似出面一式一樣既味道，絕對值得一試！
P.S.沖繩黑糖Jelly好彈牙好煙韌

朱古力窩夫$58

甜品接住上，第二個就係呢個朱古力窩夫，即使係Rbtea 食完窩夫，個意猶未盡，今次呢個窩夫配以朱古力雪糕，果然無令我地失望，雪糕比較硬身但很讚，唔會太甜，恰到好處，而窩夫則新鮮出爐，凍熱交替，滿足滿足！

燒菠蘿雪芭$48

到第三個- 燒菠蘿雪芭，雪芭清甜不膩，份量足夠幾個人食，建議係食窩夫後食。

法式焦糖燉蛋 $46

焦糖稍為凍左少少，但燉蛋幾香滑，幾重蛋味，但相對其他甜品舖黎講比較普通但稍貴。

玉桂蘋果金寶盅$46

熱辣辣，面頭的金寶是幾香脆的，底下的蘋果不會太酸，跟玉桂之間的平衡是做得幾好的。

另外配上雲尼拿雪糕，產生一冷一熱的化學作用。

P.S.值得一讚，服務細心有禮，主動問我地要唔要多幾杯水 :)