2014年10月9日 星期四

【懷舊系列】香港茶記嘅代表 - 澳牛




繼上次一探華星之後,我哋爹您術士今次嚟到香港茶記界數一數二嘅龍頭大佬 - 澳洲牛奶公司 - 朝一朝聖。無錯,澳牛係屬於我哋香港人咖。點解咁講?淨係睇啲伙記嘅態度同效率就知,完全係正宗殿堂級嘅港式茶記。

剛進門,收銀櫃台嘅伙記就嗌「五位!~嗰邊!」櫈都尚未坐暖,企喺身旁嘅伙記已經金睛火眼盯住我咃五個,雖然佢未開口,但從佢熱切嘅眼神,我聽得出「嘀嗒嘀嗒…」的聲音不斷加快,完全感受到佢幾想我哋快啲落單,唔好哂大家時間。

由於爹您術士已經食咗晚飯,就淨係嚟負責試甜品。「唔該,一個鮮奶燉蛋白吖」
「一個白!」幫我哋落單嘅伙記一咆哮,三秒後,鮮奶燉蛋白旋即由第二位伙記遞上。效率之高,實在令全枱驚嘆!伙記嘅比例完全係一枱客一個伙記,絕對係犀利過五星級酒店。

(熱) 鮮奶燉蛋白 $26
好味指數:4.5/5
推介指數:4/5

不愧用「牛奶」二字命名嘅餐廳!每一啖都滲透著濃郁嘅牛奶香味,幸福感立即湧上心頭。相對市面上其他鋪,澳牛呢碗比較黏稠,口感比較滑。

若然係特別喜愛奶味嘅朋友,即使天氣比較熱,筆者堅持推介食熱。

(熱) 杏汁燉雞蛋 $26 
好味指數:3/5  
推介指數:2.5/5

望吓個樣就知有幾滑。食落去,杏汁味道較為清淡,蛋嘅味道相對突出。如果係好似爹您術士咁聞吓都怕杏仁味,輕嚐一口,過吓口癮都係可以接受嘅。不過,對於酷愛杏汁嘅朋友而言,杏汁嘅比例稍為失望。

 
每次嚟到澳牛,筆者都必點嘅不二之選 - 茶餐。
好味指數:4/5
推介指數:4/5

茶餐-火煺炒蛋併多士
真心想拜個廚為師,點樣炒到啲蛋咁香滑。配埋烘到啱啱燶燶哋嘅多士!!!夾埋一齊放入口,十世無食到咁頂呱呱嘅快餐!真係要學食神裡面嘅家燕姐講句「嘩!好好味啊~呢種感覺好似騰雲駕霧一樣!」炒蛋嘅份量,比起一般茶餐廳多,多士亦都比較厚身,咬落去嘅口感分係絕對100!

茶餐-叉燒湯意
男生們唔洗怕唔夠飽,茶餐除咗多士炒蛋之外,仲有個麵。即使最愛沙嗲牛麵嘅我,嚟到呢度都捨棄沙嗲牛。因為港式湯意真係唔係到到有!外國人鐘唔鐘意呢種味道嘅意粉我唔知啦,但香港人就一定會鐘意。濃郁嘅豬骨湯,加上幾片肥瘦均勻嘅叉燒片,彈牙唔黏身嘅意粉。

(凍) 好立克  跟餐凍飲+$2 
當伙記察覺到我就嚟食完個茶餐,就主動問我飲咩。唔洗講,又係九秒九速度奉上。

碎冰,飲落去特別爽。邊飲邊有啲嘢咬下,又唔會令到杯嘢飲太淡味。讚!

(凍) 好立克
居然都用熱碟上,點解?
事關當旺場嗰陣,有碟托底,可以方便伙記輕鬆展現佢哋捧餐絕技,閒閒哋單手就夾住三四五杯飲品端俾啲客。



總括嚟講,澳牛嘅水準保持得幾好,「高效率,好味道!」

但切記,唔好期望喺度劉華講嗰句「親切嘅笑容,誠懇嘅服務態度」會出現,畢竟嘆澳牛,係真係食好嘢,而唔係嘆伙記虛偽嘅笑容。期望越少,越容易好似我哋咁得到喜出望外嘅服務。

未試過嘅朋友一定要試,唔係你真係唔好同人講你住香港,食過茶記。

溫馨提示:如果下午茶時段去試,有心理準備要企係熱辣辣嘅街頭等一等。筆者建議,晚飯時段去較佳,可以避開暮名而去嘅人流。


位置:佐敦白加士街47號
建議路線:佐敦地鐵站C1出口,步行5分鐘。

3 則留言:

  1. 次次去親佐敦都會食澳牛~最鐘意炒蛋 :D

    回覆刪除

Welcome to comment!!
歡迎大家留言喎!